LA PIÚ GRANDE ANTOLOGIA VIRTUALE DELLA POESIA ITALIANA I grandi poeti contemporanei

Eduardo De Filippo Poesie

Penziere mieje...   Penziere mieje, levàteve sti panne, stracciàtev' 'a cammisa, e ascite annuro. Si nun tenite n'abito sicuro, tanta vestite che n'avit' 'a fa?   Menàteve spugliate mmiez' 'a via, e si facite folla, cammenate. Si sentite strillà, nun ve fermate: nu penziero spugliato 'a folla fa.   Currite ncopp' 'a cimma 'e na muntagna, e quanno 'e piede se sò cunzumate: un'ànema e curaggio, e ve menate... nzerrano ll'uocchie, primm' 'e ve menà!   Ca ve trovano annuro? Nun fa niente. Ce sta sempe nu tizio canusciuto, ca nun 'o ddice... ca rimmane muto... e ca ve veste, primm' 'e v'atterrà.   1948   [annuro: nudi; atterrà: sotterrare]     'O pparlà nfaccia   Io chesto tengo: tengo 'o pparlà nfaccia. Pure si m'aggia fà nemico ' Ddio e me trovo cu "isso" faccia a ffaccia, nfaccia lle dico chello c'aggia dì. Se scummoglia 'o fenucchio? E se scummoglia! Ccà, pè tenè cupierte st'altarine, se sò mbrugliate 'e llengue e nun se sàpe chi te fa bene e chi male te fa. Si nun se mett' 'o dito ncopp' 'a piaga e se pulezza scafutann' 'a rinto fino a che scorre 'o sango russo e vivo cumm' a chello 'e Giesù nostro Signore 'a piaga puzza! E siente nu fetore ca t'abbelena ll'aria 'a terra 'o mare. E nuie vulimmo ll'aria fresca e pura celeste e mbarzamata e chillu viento ca vulanno e passànno a rras' 'e mare se piglia 'addore e 'a mena int' 'e balcune pè dint' 'e stanze e arriva ncopp' 'e lloggie d' 'e case noste.   1971   [se scummoglia 'o fenucchio: si sfoglia il finocchio, cioè si mette a nudo ciò che era nascosto; llengue: lingue; pulezza scafutann' 'a rinto: pulisce raschiando a fondo; abbelena: avvelena; mbarzamata: balsamica]     Ll'uosso 'aulivo   È tantillo niro niro e appuntuto, tuosto comm' a na preta: nu vriccillo... e cchiù nniro d' 'a pece. Chisto è l'uosso 'aulivo. Quanno ha menato ' rradeche int' 'e bbrecce, cumm' 'o cecato còse e nfila l'ago, e c' 'a stessa pacienzia ha zucato 'a muntagna pè nu migliaro d'anne e s'è stennuto allargato nquartato e s'è turciuto pè guardarse attuorno cumme vulenno dicere: "Guardate! Tiempo ce n'è vuluto, e che vuò dicere? L'aggio fatta 'a cacciata!", tre perzune l'abbracciano, e na folla nce s'arrepara sotto si chiove o coce 'o sole.   E p' 'e muntagne cadeno ll'aulive e ruciuleano. 'O sole 'e secca e 'a morte e 'a vita, nun aspetta! 'E ppiglia a curtellate e pè dint' 'e ferite nce và mpezzanno 'e rame già crisciute, chille ca cu certezza ncap' a n'anno, tre, quatte le fa scorrere ll'uoglio.   Tutt' 'o riesto d' 'a pianta 'o ttaglia, 'abbruccia.   1970   [uosso 'aulivo: nocciolo d'oliva; tantillo: piccolo piccolo; preta: pietra; vricillo: sassolino; rradeche: radici; bbrecce: sassi; 'o cecato còse: chi ha la vista debole cuce; zucato: succhiato; stennuto: steso; nquartato: irrobustito; torciuto: torto; aggio fatta 'a cacciata: ho offerto il meglio che potevo; coce: scotta; raciuleano: rotolano; cummoglia: copre; và mpezzanno: và infilando; uoglo: olio]     'o mare   "'O mare fa paura" Accussì dice 'a ggente guardanno 'o mare calmo, calmo cumme na tavula. E dice 'o stesso pure dint' 'e gghiurnate 'e vierno quanno 'o mare s'aiza, e l'onne saglieno primm' a palazz' 'e casa e pò a muntagne. Vergine santa... scanza 'e figlie 'e mamma!   Certo, pè chi se trova cu nu mare ntempesta e perde 'a vita, fa pena. e ssongo 'o primmo a penzà ncapo a me: "Che brutta morte ha fatto stu pover'ommo, e che mumento triste c'ha passato". Ma nun è muorto acciso. È muorto a mmare. 'O mare nuna cide. 'O mare è mmare, e nun 'o sape ca te fa paura.   Io quanno 'o sento... specialmente 'e notte quanno vatte 'a scugliera e caccia 'e mmane... migliara 'e mane e braccia e ggamme e spalle... arraggiuso cumm'è nun se ne mporta ca c' 'e straccia 'a scugliera e vveco ca s' 'e ttira e se schiaffea e caparbio, mperruso, cucciuto, 'e caccia n'ata vota e s'aiuta c' 'a capa 'e spalle 'e bracce ch' 'e piede e cu 'e ddenoccie e ride e chiagne pecché vulesse 'o spazio pè sfucà... Io quanno 'o sento, specialmente 'e notte, cumme stevo dicenno, nun è ca dico: "'O mare fa paura", ma dico: "'O mare sta facenno 'o mare".   1968   [accussì: così; gghiurnate: giornate; vierno: inverno; onne: onde; a palazz' 'e casa: alte come palazzi; scanza: risparmia; vatte: batte; arraggiuso: rabbioso; s' 'e ttira: le ritira; se schiaffea: si schiaffeggia; mperruso: puntiglioso; ddenocchie: ginocchia; sfucà: sfogarsi]     ROMA   L'orario e 'a strada pè truvà pace e cammenà cuieto, pè fà capì a te stesso cumm'è 'o penziero ca tu tiene ncapa, si sàpe 'e sale si ha pigliato 'e fummo si vale 'a pena invece d' 'o penzà, a Roma chesta strada ce sta sempe. 'A truove sempe 'a strada 'a piazza 'o vico: se trova all'alba 'e juorno 'e notte, sempe. Attuorno siente 'a musica d' 'e vvoce, pè ll'aria 'a luce e ll'ombra d' 'e pparole: parole grosse e chelli piccirelle. Truove 'e mountagne 'o verde d' 'a campagna 'e ccase d'oro ca se fanno rosse pò 'e ramma, cumm'attone e doppo 'argiento... Te truove overamente ncopp' 'o munno cuieto e sulo e stienne 'o passo nzieme c' 'o nzieme c' 'o penziero.   1970   [cuieto: tranquillo; si sàpe 'e sale: se c'è del sale, se è valida; si ha pigliato 'e fummo: se ha preso tanfo di fumo, se è da buttar via; attone: ottone; stienne: allunghi]     'a... b... c... d...   Nu fugliett' 'e quaderno aggiu truvato ncopp' a nu marciapiede. Pè capì che steva scritto me l'aggiu piglaito. Lettere grosse e storte: A... B... C... D...   Mille quaderne, mille guagliuncielle: scriven' eguale, 'o stesso, a chell'età. Però quanno se fanno grussicielle, stu carattere eguale chi t' 'o dà?   Nun capisco, se guastano p' 'a via, nun trovano cchiù pace... ma pecché? Stùriano pè cagnà calligrafia e ognuno scrive cumme vò parè.   Ce hanno criato ' na manera sola, chi cagne è pè superbia, t'ho dich'j'... 'E guaglinucielle, quanno vann'a scola, scriveno tutte eguale: A... B... C... D...   1930   [guagliuncelle: ragazzetti; chi t' 'o dà: dove lo trovi; stùriano: studiano, si danno da fare; cagnà: cambiare; paré: sembrare]     'a fenesta   E tengo na fenesta a pianterreno, c'affaccia int' a na strafa scanusciuta; cu n'aria profumata, e na veduta, ca si t'affacce, nun t' 'a scuorde cchiù.   Si stongo 'e buonumore, affacci' a mmare, e veco semp' 'o stesso bastimento ca parte chin' 'e fede e sentimento, e c' 'a bandiera d' 'a sincerità.   Parte ciuro, e nun arriva maje. Quanno s'abbìa, sabbìa c' 'o maistrale; ma ncòccia sempre 'o stesso tempurale, 'o stesso maletiempo, e adda turnà!   Quanno senza speranza, e senz'ammore m'affaccio e vec' 'o stesso bastimento, nce mengo dinto 'o core mio scuntento, e c' 'o mare ntempesta dico: "Va".   Quann'è bontiempo, ognuno è marenaro e se vulesse mettere a temmone... C' 'o mare ncalma, tutte songo buone 'e purtà nu vapore a passià.   Miéttece a buord' 'o bene ch' 'e vuluto, e tutt' 'o chianto amaro ch'è custato... Nisciunu bastimento s'è affunnato quanno ce' 'e miso a buordo 'a Verità.   1947   [scuorde: dimentichi; s'abbìa: s'avvia; maistrale: maestrale; ncòccia: intoppa: nce mengo dinto: ci butto dentro; temmone: timone; passià: passeggiare; chianto: pianto; affunnato: affondato]     'a seggia   'A primma pazziella ca cchiù te piace e ca te dà cchiù gioia... e ca pirciò t' 'a danno ...è 'a siggiulella.   Tiene n'anno e capisce ch'è 'a toja. Nun parle ancora, e pure: guaie chi 'a tocca.   Tutt' 'a stessa mesura, no una chiara e una scura: songo tutte tantelle ' e ssiggiulelle d' 'e piccerille e d' 'e piccerenelle.   Pò addeventa siggione, pò se trasforma a sseggia; e nun t' 'a danno cchiù: te ll'j' a piglià.   Ma nun songo cchiù eguale, nonzignore. Ce sta chella mpagliata, lucida 'e pulitura, mpellicciata e allustrata; e chella adderittura c' 'a spallera ndurata, tapezzata 'e velluto.   Dint' 'a cantina o ncopp' 'o Tribunale, addò s'assett' 'a Legge; dint' a nu vascio, dint' a dò barbiere, a Palazzo Riale, dint'a dò pasticciere, ce truov' 'e seggie. E mmiez' 'e seggie, 'a seggia, chella ca tu vulisse: 'a pazziella d' 'e piccerille gruosse.   1948   [pazziella: giocattolo; siggiulella: seggiolina; tantelle: piccine; piccerille... piccerinelle: bambini... bambine; siggione: sediolone; te ll'j'a: te la devi; ndurata: dorata; vascio: basso, abitazione a piano di strada; gruosse: grandi, cresciuti]     'o munno d' 'e pparole   Si t' 'o ddico nun me cride manco si pittass' 'o sole pecché 'o munno d' 'e pparole mpara ll'arte d' 'o pparlà.   E tu saje ca st'arte è l'arte ca se sceglie 'o traditore pecché l'ommo senza core fa furtuna c' 'o pparlà.   Io, gnorsì, pire sò chillo c'ha liggiuto e s'è applicato; c' 'o mestiere s'ha 'mparato, e se serve d' 'o pparlà...   Se capisce ca parlanno, nciucio, mbroglio... e faccio 'ammore. Ma però tengo nu core e cu te, che vuò parlà!   1944   [si pittass' 'o sole: se facessi l'impossibile; nciucio: mi servo di qualunque mezzo; che vuò parlà: rimando muto, perché ti amo]     'a vita   Io songo nat' 'o millenoviciento e tengo n'anno. Tu sì d' 'o sittantotto e n'anno tiene. Chillo che dice: "Sò arrivato a ciento!" tene n'anno pur'isso.   'O calannario nun 'o date retta. 'O calannario è n'atu scucciatore, ca vuluntariamente nce 'accattammo nuje stesse e nce' 'o piazzammo vicin' 'o muro religiosamente.   'A vita dura n'anno. Tutto 'o ssupierchio è na supirchiaria. o, cumme fosse, inutile... Dicimmo a lengua nosta: "È p'ingiaria!"   Tu, quanno nasce, allora è primmavera. E tutt' 'o vverde nuovo 'e chelli ffoglie nove è na speranza! È tutta na speranz' 'e vita allera. Vide tanta faccell' 'e criature ch' 'e scuffie culurate: sò tutt' 'e ccriaturelle nate morte, ca tenen' 'o permesso, na vota all'anno, 'e s'affaccià p' 'o munno... E teneno diritto a 'o primmo sole: sò è primme viole!   Pò schiòppene garuofene schiavune e giesummin' 'e Spagna. 'A miez' a mille sciure, ca sò 'e mille sciure, ca sò 'e mille culure, ru sciglie 'a margarita, ca t'add'accumpagnà pè tutta 'a vita. E; comme ch'è nu sciore busciardo e traditore, te dà 'o primmo delore... te dice: "No!"   Te scite na matina e 'o sole coce. Coce pecché è ll'està. Te scite e durmarisse n'atu ppoco, ma dint' 'o lietto nun ce se pò sta. Nfra veglia e suonno, ll'uocchie mieze nchiuse, stienne na mana e cuoglie na cerasa.   'A sera, 'o ppoco 'e frisco e nun t'adduorme... pecché nun può durmì. Pienze che vene autunno, e tu ce pienze pecché, pò doppo, vierno adda venì. 'E penziere sò assaie, t'addubbechie. Sient' 'a voce 'o puntone: "Chin' 'e fuoco!" Ma par' 'o boia ca taglia e quanno taglia, sott' 'a curtella, schioppa nu mellone.   Vene l'autunno te lass' appecundruto. Già miezo cunzumato te trova vierno. acqua, trònole e viento, e tu nzerrat' 'a dinto: broro vullente!   Spara sti botte, alluma sti bengale; arrust' 'e capitune, ch'è Natale!... Ncoll' 'e pasture!...   Ca mpunto mezanotte, nasce 'o Bammino. Chella, mamma, è devota, perciò nasce 'o Bammino.   Sti Bammeniello nasce n'ata vota? Lassat' 'o j'... Chillu stesso martirio 'e quanno è nato l'adda turnà a suffrì?   'A vita dura n'anno. Tutt' 'o ssupierchio è na supirchiaria. È, comme fosse, inutile/ Dicimm'a llengua nsota: È p'ingiaria.   1931   ['accattammo: compriamo; piazzammo: mettiamo; ssupierchio: superfluo; supirchiaria: eccesso; a lengua nosta: nellansotra lingua; p'ingiaria: per avidità, smodatezza; allera: allegra; facell' 'e criature: faccine di bimbi; scuffie: cuffiette; schiòppene: sbocciano; garuofene schiavune: garofani rosso scuro; sciure: fiori; scite: svegli; coce: scotta; està: estate; vierno: inverno; t'addubbecchie: vai in torpore; 'o puntone: all'angolo della strada; cin' 'e fuoco: pieno di fuoco (rosso); schioppa: sboccia; lass'appecundruto: lascia di cattivo umore; trònole: tuoni; broro vullente: brodo bollente; botte: mortaretti: alluma: accendi; ncoll' 'e pasture: incolla i pastori; lassat' 'o j': lasciatelo stare]     'o cunto   Cielo ca puntualmente 'o mes' 'austo abbremecato 'e stelle te presiente, e ca te faie cchiù blù pecché cchiù argiento cchiù splendente e brillante sti meliune 'e stelle 'anna parè... cielo, tu saie che ssì pè chistu munno, pè nnuie ca t'aspettammo e te vedimmo? Sì 'o finale ncantato 'e nu cunto ca nuie stesse ammentammo, e sulitariamente c' 'o core e c' 'o penziero nce cuntammo.   cumme se specchia a mmare dint' 'o cuntammo.   Cumme se specchia a mmare dint' 'o scuro 'o ffuoco d' 'e granate! Se spara p' 'a custiera, tuorno tuorno... Pè San Giuvanne, Puortece, Resina, Torre 'o Grieco, Pumpei, Castellammare... 'A rimpetto risponne Vico Equense, Sant'Agnello, Surriento... Aret' a na muntagna nu bagliore: spara Massa Lubrense. Marciano pure spara... e appriesso appriesso sant'Agata crapolla Pusitano... Spara Furore Vietri e sparano a Praiano. Cielo, sò 'e stelle noste, sò 'e pparole mbrugliate 'e nu discorso ca sultanto sparanno trova 'o filo, pè te dà na risposta pè te dà segno 'e vita pure nuie...   E ogn'anno, 'o mes' 'austo, puntualmente ognuno conta 'o cunto a modo suio...   1970   [abbremmecato: formicolante; cunto: racconto; ammentammo: iventiamo; cuntammo: raccontiamo; tuorno tuorno: torno, torno; aret' a: dietro a; appriesso appriesso: uno dopo l'altro; mbrugliate: imbrogliate]     'a gente   'A ggente ca me vede mmiez' 'a via me guarda nfaccia e ride. Ride e passa. Le vene ammente na cummedia mia, se ricorda ch'è comica, e se spassa.   Redite pè cient'anne! Sulamente, v' 'o vvoglio dì pè scrupolo 'e cuscienza: io scrivo 'e fatte comiche d' 'a ggente... E a ridere, truvate cunvenienza?   ...Nun credo   1949     'a neva   Nu sole spaccaprete fatt'a fferz' 'e lenzole menate dint' 'e bbarche e ncopp' a tutt' 'e case ammuntunate sott' 'o Vesuvio e ncopp' a vocca soja zucchero in polvere, cumme si 'e pressa 'e pressa a uocchio a uocchio $avesse fatto uno muorzo surtanto 'e na pasta bignè.   E che cielo! Nu cielo a tavuletta trasparente e turchese. Accussì scenne a Napule, ncopp' 'o Vesuvio, 'a neve. 1972   [fferz' 'e lenzole: teli di lenzuola; ammuntunate: ammucchiate; vocca; 'e pressa 'e pressa: presto preso; a uocchio a uocchio: furtivamente; a tavuletta: uniforme, come una tavola dipinta]     L'esportazione   Per i problemi del meridione c'è stato un certo riconoscimento che da quando ci fu il risorgimento con ansia s'aspettava 'a decisione.   Finalmente è arrivata! Il milanese, che esporta e importa e nun le mporta niente si tu te muore 'e famma e te lamiente, si è commosso e ci ha detto: "Questo mese   daremo al meridione la patente di terzo grado come esportatore: che volete esportare, buona gente?" E il meridione ha detto: "'O core è core. Quello che il settentrione ci consente: nu poco di colera di strafore".   1973   ['O core è core: letteralmente, una generosità partita dal cuore, di cuore la rciambiamo; qui in senso ironico: quel che è fatto è reso]     'O rraù   'O rraù ca me piace a me m' 'o ffaceva sulo mammà. A che m'aggio spusato a te, ne parlammo pè ne parlà. Io nun sogno difficultuso; ma luvàmell' 'a miezo st'uso.   Sì, va buono: cumme vuò tu. Mò ce avèssem' appiccecà? Tu che dice? Chest'è rraù? E io m'a 'o mmagno pè m' 'o mangià... M' 'a faje dicere na parola? Chesta è carne c' 'a pummarola.   1947   Eduardo De Filippo

Per leggere l'intervista a Carlo Giuffré di Adriana Montefameglio Per leggere un articolo di Olivia Trioschi Torna alla Home Page       ©2000 Il club degli autori, Eduardo De Filippo Per comunicare con il Club degli autori: info@club.it Prima di scriverci si consiglia di leggere le FAQ   IL SERVER PIÚ UTILE PER POETI E SCRITTORI ESORDIENTI ED EMERGENTI Home club | Bandi concorsi (elenco dei mesi) | I Concorsi del Club | Risultati di concorsi |Poeti e scrittori (elenco generale degli autori presenti sul web) | Consigli editoriali | Indice server | Antologia dei Poeti contemporanei | Scrittori | Racconti | Arts club | Photo Club | InternetBookShop | Inserito 22 febbraio 2000