- Juanni
su sabateri
-
- Arrosciu
de fai' su sabateri, Juanni hat dezidiu de si ponni'
in comerciu.
- Po
Juanni, chi fadiat su sabateri de piciocheddu,
cust'idea de su comerciu dda portad'in conca de meda
tempus, ma no arrenesciat mai a si dezideri. A is
pagus clientis chi ancora teniat ddis narat sempri sa
propria candonca: "Oi o cras lassu totu e mi pongu in
comerciu, cun s'arti no si podit biviri prus."
- Ndi
chistionat cun Caderina, sa mulleri, e dda preparat
narandudeddi: "Oi est Santu Crispinu e depia essiri in
festa... e invecis, castia de anca port'is manus totu
nieddas che pixi! Mì, fraga... E ita intendis
Caderì?"
- "Fragu
de acua 'e sola, Juà, e ita bolias chi hessi'
intendiu fragu de coty?!"
- "Tui
puru mi pigas in giru... Tui puru ti brullas de mei?
Ma no has cumprendiu chi seu arrosciu de intendiri
custu fragu dì e noti, a iscidu e a dromiu,
candu papu e candu mi fazu sa barba, e no c'est
detersivu chi ndiddu pozat leari!"
- "Juanni
miu, depis sciri chi dogna mestieri tenit su fragu
suu; su tuu est fragu de sabateri, un'arti umili ma
utili po totus in d'una bidda. Ses arrispettau e tentu
in considerazioni de totu sa genti po s'onestadi de su
traballu chi fais, nara e it' est su chi t'est benniu
a conca? Nah, no has a bolli' fai su professori... No
ti scarescias chi seus nascius poberus e aici e totu
heus a morri'... No ti dda pighisti e pregaddu a Santu
Crispinu, chi is cosas hant'a cambiai assumancus po
fillu nostu, Pissenti! Teni passienzia, Juanni, faeddu
po su pipiu, scedau! Si tocat a tenni' passienzia...
Si depeus sacrificai po custa creatura, tocat a fai'
su possibili e prus de su possibili ! A costu de
aturai senza 'e papai, a fillu nostu ddu fadeus
studiari...no depit hessiri che a nosus! Juà,
una cosa ti naru: mellus su fragu de pixi, che is
sonus de su famini!"
- "Caderina,
tot'is cosas chi tui ses narendu, deu mi ddas naru a
mimi e totu dogna santa dì chi arbescit, e non
de oi sceti... No, Caderina, deu hapu bell'e pigau sa
decisioni mia:mi pongu in comerciu!"
- "Juà,
ne piga, ponedi su termometru, tui depis portai sa
frei arta, custus no sunti fueddus bessius de buca
tua..."
- "Caderina,
ascurtamì, nc'hapu penzau totu sa noti... po
podiri studiai a Pissenti e cantus mesu solas e tacus
hia a depiri fairi dogna dì? Seu duus mesis chi
no fazu una pariga de crapitas noas, ma annotas o no
is cosas; E pois is fabricas modernas hant'arrovinau
s'arti nosta! No c'est prus su traballu de prima!
Castia cussas formas e i cussas ainas, sunti prenas de
mufa: sunt'annarbandusì... Caderina, traballu
no ci nd'est! Sa genti bandat a Casteddu a si comporai
botinus de lussu, e is pastoris, crapitas de peddi
crua no ndi bolinti prus; s'arti nosta est finia no
ddu cumprendis, Caderìna!"
- "Juanni,
hat a essi' aici comenti naras, ma tui no ses fattu po
su comerciu; a tui parit facili sa cosa, ma no est
aici..."
- "Caderina,
tui no tenis fiducia in mei...Candu s'omini sciit fai'
is crapitas coment'e a mei, arregodadì chi no
c'est nudda chi no scipat fai!"
- "Juanni,
e tui bonu hias a essiri a fai su
Papa?"
- "Deu
eia, Caderì, ma su Papa, a fai' una pariga de
crapitas coment'e a mei, no creu
propriu!Arregordadiddu!"
- "Ma in
comerciu no bastat a sciri fai' beni una pariga de
crapitas, tocat a pesai, a fai' de contus, e chi
serbit a tocai puru de cartabullada,... No, no est
cosa po tui, Juanni, sa cosa bolit beni sestada, ci
'olit iscola in su comerciu!"
- "Eh,
imoi ses fadendudedda longa! No hat'essiri prus
difficili de sestai' una pariga de botinus de femina!
E ita bolis chi siat a pesai e a fai' is contus:
fesserias! Sunti fesserias!"
- "E pois,
Juà, ita comerciu hias a bolli' fairi; Nci
nd'est fin'e tropu de butegas in bidda, su chi mancat
est su dinai!"
- "Ancora
cussa decisioni no dd'hapu pigada. Seu
penzandudenci."
- "Toca,
Juanni, no ti scimingis sa conca, in calencunu modu
dd'heus a trumbulari custa vida, Deus anima in pena no
ndi lassat e a su piciocheddu dd'heus a fai' studiari
su propriu..."
- "Sciis
ita ti nau, Caderina, de custa bidda mi ndi bollu
andai. Ma no biis chi no c'est prus nisciunus; sono
tutti emigrati! Si nd'andaus nosus
puru."
- " E
andau ses puru!"
- "Sì.
Si nd'andaus totus a Casteddu. Santu Crispinu m'hat
donau su cunzillu giustu...Portamì paperi e
pinna ca scriu a su capitanu..."
- " E
chin'est custu capitanu chi
conoscis?"
- "Si
narat capitano Giovanni Giuseppe"
- "Ma,
nara, sangunau no ndi tenit custu
capitanu?"
- "Sì,
unu fiat su nomini e s'ateru su
sangunau"
- "Hapu
cumprendiu, no ddu scis mancu tui...
- "Po ti
nai sa beridadi no est chi c'hapu cumprendiu meda,
perou in is literas chi dd'arribanta ci fiat casi
sempri scritu capitano Giovanni Giuseppe e calencuna
borta sceti, capitano Giuseppe Giovanni. In s'unu modu
o in s'ateru sa litera arribat."
- "Mì...,
paperi, pinna e busta, s'indirizu ddu
sciis!"
- "Beni
'eni no, ma m'arregordu chi issu biviat in Piazza
Yenne; Bolis chi su postinu no ddu
conosciat?"
- "Juanni,
fai totu tui, tantis ses abetiosu e candu ti ponis
un'idea in conca, ses tostau peus de unu
molenti..."
- Juanni
si ponit in coa sa tauledda de anca traballat sa
facheta e sa sola, e comenzat sa litera: "Sono
l'attendente Furca Giovanni di Biddascarescia. Si
arregordat di me? Sono quello che aveva fatto le
scarpe alla sua fidanzata di Casarsa e siccome mi devo
trasferire a Cagliari con la mia signora Caterina e il
mio figlio Pissente chiedevo se mi può trovare
un alloggio di casa per noi tre, col piacere e con la
paga si intende. Io vivo sempre a Biddascarescia e
spero che lei mi risponda. Le mando in questa lettera
che imbuco i saluti di me e di mia moglie e di mio
figlio.
- Il suo
attendente Furca Giovanni di
Biddascarescia."
- Juanni,
totu cuntentu ca sa litera dd'est parta bella e beni
bessia, castiendu sa mulleri ddi
narat:
- "Ne,
piga, imoi bai e imbucancedda !"
- "Juà,
nci bolit su francubullu!"
- "No,
niente francubullu! Ne sa pinna, aciungenci: Posta
militare, aici no si pagat nudda!"
- "Ma ita
ses narendu Juà, de cand'est acabada sa
gherra...imoi no balit prus cussa, ci bolit su
francubullu"
- "Aici
naras, Caderì, e inzandus?"
- "E
inzandus ci bolit su francubullu canduchinou sa litera
no fait mancu unu passu... E tui ti bolis ponni' in
comerciu ! Mancu malis chi nci seu
deu..."
- "Brava
Caderìna, m'est bennia una bella idea: tui
m'has a fai' de segretaria, ca ses istruia prus de
mei, e candu Pissenti si diplomat hat a penzai issu a
tenni' is contus de totu..."
- "Veramenti
deu hemu fattu un'ateru detreminu,
Juà..."
- "Naramì,
naramì, tui tenis sempri bonus penzamentus,
eh..., si no essi' tentu a tui..."
- "Cand'has
dezidiu de andai a Casteddu po ti ponni' in comerciu,
mancari t'hapa fattu su contrariu, tra mei e mei hapu
penzau: ...e deu mi pongu a sciacuai scalas po agiudai
a Juanni e a Pissenti..."
- "Custu
no ddu primitu! Mancari siasta mulleri de sabateri,
tui Cadirina, has a essiri, la signora Furca; Deu in
is primus tempus hapu a traballari in s'arti e m'hapu
a fai' medas clientis... in d'una cittadi de genti nci
nd'est meda, no est coment'e bidda nosta chi seus
pagus e tantis bandant' puru iscurzus ca no tenint
sustanzia e aturus po asurenzia portant'is crapitas
acapiadas a fileferru!"
- "Juà,
mi parit chi seus fadend'unu sognu...Nosus in
Casteddu...; tui commercianti...; deu signora, candu
no dda sciu mancu fai... e pois ci no teneus mancu su
'inari po su francubullu... Ma, cumercianti de
ita?!"
- "No
Caderina, custu no est sognu, sa litera depit
partiri... Castia in cussu cadasciu mi parit chi ci
sunti literas becias stacand'unu francubullu e
ghetasiddu! In calencunu modu sa litera nc'hat
arribai... a costu de si fai' prestai' unu
francubullu... No si depeus arrendiri po custu...
"
- Caderina
forrogat in su cadasciu e agatat una litera chi Juanni
dd'hiat scritu candu fiat sordau, nddi bogat a
malamanera, ma intreu, su francubullu, dd'apicigat a
sa litera e dda donat a Pissenti po
dd'imbucari.
- "Babbo,
ma qui ci manca il mittente, proprio oggi il prof. ci
ha detto di non spedire mai nulla senza il mittente,
se il destinatario non si trova, Le Poste, la
cestinano."
- "E chini
benit a essiri custu mitenti...?"
- "...Non
preoccuparti, babbo, ci penso io..."
- Pissenti
scriit in bella calligrafia su nomini de su babbu, sa
via e s'indirizu e dda spedit.
- " A ddu
biis, Juanni, nosus is cosas no ddas scideus, no est
fazili a fai su comercianti senza de tenniri
iscola..."
- "Anca
fut nasciu, iscola tenit Graziedda de su stangu?
Tantis chi no nd'hat fatu de dinari e de
sienda!"
- Hat
passau pagu o prus unu mesi candu est arribada sa
litera de su capitanu, nandu a Juanni, chi sa domu est
pronta e chi no si preocupit de
nudda...
- "...alloggerete
in una mia casa sfitta che vi offro senza nulla
pretendere fino a quando non vi sarete sistemati in
modo definitivo.... Mia moglie conserva gelosamente il
ricordo delle scarpe fate da te e ne parla con
orgoglio a tutte le sue amiche ed è lieta di
avervi vicini di casa..."
- A Juanni
e a Caderina no ddis est partu beru su chi hanti
ligiu, mandant unu telegrama a su capitanu, nolegiant
unu autocarru po carrigai sa pagu mobilia, su strexu,
e is ainas de s'arti, e dezidinti de
partiri...
- ***
- Juanni
hat sighiu a fairi su sabateri po unus cant'annus e
pois, cun su risparmieddu e cun su chi godangiat
Caderina in sa portineria de su capitanu hat coronau
su sognu suu: Hat bendiu totu: sulas, trincetus,
fromas, e finas e sa mesiscedda chi dd'haiat lassau su
babu; hat allogau solu su peieferru, unu marteddeddu,
unu trincetu, e is formas numeru trentanoi (sa misura
sua e de Caderina), in casu dd'hessint serbius, e
s'ateru po si podiri ponni' is tacus po sa familia
sua...
- "Cun
s'arti hapu acabau! No ndi 'ollu intendi' prus de
fragu de pixi e de acua 'e sola! - Hat nau a Caderina
e a Pissenti, contandu su 'inari chi dd'hiat donau
s'aprendista de Santa Tennera chi teniat in butega, po
is ainas chi dd'hiat bendiu - e de cras, comenzu una
vida noa..."
- "It'has
dezidiu, Juà, calencuna
cosa?"
- "Ancora
nudda, Caderì, sa noti hat a batiri cunzillu,
has a biri!"
- Pissenti
chi s'est apenas diplomau e hat subitu agatau unu
postu in banca, lassat fai', no intervenit in sa
disputa, ca in conca sua ddu est Margherita una
cumpangedda de iscola...
- Juanni
nci 'essit acuitu de domu e punnat a su mercau
all'ingrosso: dd'hat lompiu boxi chi s'allu est
pigandu preziu po curpa de s'annada mala (aici dd'hat
nau unu signori napolitanu chi bendit in su mercau
all'ingrosso).
- "A cantu
s'allu, su ziu?"
- "A
millecincu su chilu, oramai hat pigau preziu prus de
su zaferanu! S'annu chi benit parit chi ci siat
crisi...ma si bolit comporai seriamenti si poneus di
acordiu, depu lassai s'atividadi po maladia... Se le
interessa le cedo la merce e anche il magazzino, in
affitto, s'intende."
- "Torru
cras e decideus" - dd'hat nau Juanni.
- "Cras
est tradu - dd'hat nau su ziu - est benendu un'ateru
signori e creu propriu po fai'
s'afariu."
- "Neridimì
s'urtima cifra e cocludeus" - Dd'hat arrispustu
Juanni.
- "Binti
quintalis de merci a millecincu fait 3.000.000 giustu
giustu. No ddi fazu scontu ma po duus mesis ddi lassu
su locali gratis, prus de custu,
bolit..."
- Juanni,
chi in conca sua, fiat penzendu a su chi hiat a depiri
godangiari, acetat e concluit
s'afariu.
- Juanni,
chi oramai si intendit prus comercianti che sabateri,
torrat a domu cun is crais de su magasinu e cun su
contratu in buciaca, ma de sa cosa no ndi fait fueddu
ne a Caderina, ne a Pissenti, est intenzionau de
bendiri totu candu scadit su contratu di s'afitu e de
ddis fairi una bella sorpresa cun su primu godangiu de
comercianti... Ma sa sorpresa manna dd'hat agatada
issu candu, tres mesis agoa, hat abertu su magasinu.
Unu disastru!!!
- Totu
s'allu s'est sbuidau e inzeurrau aici e totu coment'e
su sognu de Juanni de diventai
comercianti.
- "Te
l'avevo detto che tu non eri tagliato per il
commercio? -Dd'hat nau Caderina, anzi la signora
Furca.
- A
dognunu s'arti sua, Juà, ma no ti preocupis. Su
piciocu dd'heus diplomau e Pissenti hat a penzari po
sa becesa nosta puru..."
- "Tenis
arrexoni, Caderina, sciis ita ti naru? Est mellus su
fragu de s'acua 'e sola che su fragu de s'allu! Torru
a pigai s'arti! No seus a morri' po custu dannu!"
- "Caderina,
tui has sempri agatau su setiu giustu po dogna cosa,
has biri chi has agatai su cabudu giustu custa borta
puru, ndi seu siguru."
|
PER COMUNICARE CON L'AUTORE
